മലബാർ സമരം ക്വിസ്

❓മുസ്ലിംകളുടെ ആഗോള ആത്മീയ നേതൃത്വമായി കരുതപ്പെട്ടിരുന്ന തുര്‍ക്കിയിലെ ഖലീഫയെ ബ്രിട്ടിഷുകാര്‍ സ്ഥാനഭ്രഷ്ടനാക്കിയതിനെതിരെ ഇന്ത്യയില്‍ മുസ്ലിം നേതാക്കള്‍ ആരംഭിച്ച പ്രസ്ഥാനം?
✅ ഖിലാഫത്ത് പ്രസ്ഥാനം.
🎯 സ്വാതന്ത്ര്യസമരത്തിന്റെ ഭാഗമായുള്ള നിസ്സഹകരണ പ്രസ്ഥാനവും ഖിലാഫത്ത് പ്രസ്ഥാനവും ഒന്നിച്ചു പ്രവര്‍ത്തിക്കണമെന്ന  ഗാന്ധിജിയുടെ ആഹ്വാനത്തെ തുടർന്നാണ് 1920-ല്‍ മലബാറില്‍ കോണ്‍ഗ്രസ്-ഖിലാഫത്ത് പ്രവര്‍ത്തനം സജീവമാക്കുന്നത്. 

 ❓സ്വാതന്ത്ര്യസമര പോരാരാട്ടമായും കർഷക കലാപമായും മാപ്പിള ലഹളയായും മലബാർ വിപ്ലവമായും പല പേരുകളിൽ വിളിക്കപ്പെടുന്ന മലബാർ സമരം നടന്ന വർഷം ഏത്?

✅ 1921. 

❓ 1857-ലെ ഒന്നാം സ്വാതന്ത്ര്യസമരത്തെ ശിപായി ലഹള എന്നു വിളിച്ച് ഇകഴ്ത്തിക്കാണിക്കാൻ ശ്രമിച്ച പോലെ സാമ്രാജ്യത്വ അനുകൂലികൾ മലബാർ സമരത്തെ എന്തു പേരിട്ടാണ് വിളിച്ചത്?

✅ മാപ്പിള ലഹള. 

❓രാജ്യത്തെ സ്വാതന്ത്ര്യസമര പോരാട്ടങ്ങളിലെ സുപ്രധാന ഏടുകളിലൊന്നായ 1921-ലെ മലബാർ സമരത്തിന് നേതൃത്വം നൽകിയ പ്രധാന നേതാക്കൾ ആരെല്ലാം? 

✅ വാരിയംകുന്നത്ത്​ കുഞ്ഞഹമ്മദ്​ ഹാജിയും ആലി മുസ്​ല്യാരും. 

❓മലബാർ സമരത്തിന്റെ ഭാഗമായി മലപ്പുറം ജില്ലയിലെ പൂക്കോട്ടൂരിൽ വെച്ച് മാപ്പിള പോരാളികളും ബ്രിട്ടീഷ് സൈന്യവും തമ്മിൽ ചരിത്ര പ്രസിദ്ധമായ പൂക്കോട്ടൂർ യുദ്ധം നടന്നതെന്ന്?

✅ 1921 ഓഗസ്റ്റ്-26.

🎯 ആയുധ ശേഷിയിൽ ഏറെ മുന്നിലുണ്ടായിരുന്ന ബ്രിട്ടീഷ് പട്ടാളം അഞ്ചു മണിക്കൂർ നീണ്ട പൊരിഞ്ഞ പോരാട്ടത്തിനൊടുവിൽ പിൻവാങ്ങി. 

❓1857-ലെ ഒന്നാം ഇന്ത്യൻ സ്വാതന്ത്ര്യ സമരത്തിനു ശേഷം ബ്രിട്ടീഷ് സാമ്രാജ്യം നേരിടേണ്ടി വന്ന ഏറ്റവും വലിയ സായുധ പോരാട്ടം എന്ന് ബ്രിട്ടീഷുകാർ രേഖപ്പെടുത്തിയത് ഏതിനെക്കുറിച്ചാണ്?

✅ പൂക്കോട്ടൂർ യുദ്ധം.

🎯 ഇന്ത്യൻ സ്വാതന്ത്രസമര ചരിത്രത്തിലെ ഏക യുദ്ധം എന്നും ഈ പോരാട്ടത്തെ വിശേഷിപ്പിക്കാറുണ്ട്.

❓ലോകത്തിന്റെ നാലിലൊന്ന് ഭാഗവും അടക്കി ഭരിച്ചിരുന്ന ബ്രിട്ടീഷ് സാമ്രാജ്യത്വത്തിനെതിരെ ജനകീയ സായുധ പോരാട്ടം നടത്തി ഏറനാട്, വള്ളുവനാട്, പൊന്നാനി, കോഴിക്കോട് താലൂക്കുകളിലെ പ്രദേശങ്ങള്‍ ചേര്‍ത്ത് വാരിയംകുന്നത്ത് കുഞ്ഞഹമ്മദ് ഹാജി രൂപീകരിച്ച സ്വതന്ത്ര രാജ്യത്തിന് നല്‍കിയ പേരെന്തായിരുന്നു?

✅ മലയാള രാജ്യം.

🎯 ബ്രിട്ടീഷുകാരെ തുരത്തിയോടിച്ച് സ്വയം ഭരണം നടത്തിയ (ആറു മാസത്തോളം) ആദ്യത്തേതും അവസാനത്തേതുമായ ദേശമായിരുന്നു ഇത്. 

❓മലബാർ സമരത്തെ അടിച്ചമർത്തുന്നതിന്റെ ഭാഗമായി നടന്ന, അന്നത്തെ ബ്രിട്ടീഷ് സർക്കാരിന്റെ ഭീകരത വെളിപ്പെടുത്തുന്ന സംഭവം ഏത്?

✅ വാഗൺ ട്രാജഡി കൂട്ടക്കൊല. 

🎯 നവംബര്‍ 19-നായിരുന്നു കുപ്രസിദ്ധമായ വാഗണ്‍ ദുരന്തം. അറസ്റ്റിലായ 100 പ്രക്ഷോഭകരെ കുത്തിനിറച്ച് അന്നു തിരൂരില്‍ നിന്നു കര്‍ണാടകയിലെ ബെല്ലാരി ജയിലിലേക്കു പുറപ്പെട്ട ചരക്കുവാഗണ്‍ പോത്തന്നൂർ വരെ എത്തിയപ്പോഴേക്കും 56 പേര്‍ ശ്വാസംമുട്ടി മരിച്ചു. പിന്നീട് എട്ടുപേര്‍ കൂടി മരിച്ചു. രക്തസാക്ഷികളില്‍ 61 മുസ്ലിംകളും 3 ഹിന്ദുക്കളുമടങ്ങുന്നു. 

❓വാഗൺ ട്രാജഡി കൂട്ടക്കൊല നടന്നത് എത്രാം നമ്പർ ഗുഡ്‌സ് വാഗണിലായിരുന്നു? 

✅ MSMLV 1711.

❓മലബാർ സമര പോരാളികളെ വെളിച്ചമോ വായുവോ കടക്കാത്ത ഗുഡ്‌സ് വാഗണിൽ കുത്തി നിറച്ച് തിരൂരിൽ നിന്ന്  കൊണ്ടു പോകുന്ന വഴി തുറന്നു നോക്കിയത് ഏത് സ്റ്റേഷനിൽ വെച്ച്?

✅ പോത്തന്നൂർ (തമിഴ്നാട്).

❓വാഗൺ ട്രാജഡി കൂട്ടക്കൊലയെ കുറിച്ച് അന്വേഷിക്കാൻ മദ്രാസ് സർക്കാർ നിയമിച്ച കമ്മീഷൻ?
✅ എ.ആർ. നാപ്പ് (A.R. Knapp) കമ്മീഷൻ.

❓വാഗൺ ട്രാജഡി മെമ്മോറിയൽ ഹാൾ സ്ഥിതി ചെയ്യുന്നത് എവിടെയാണ്? 

✅ തിരൂർ.

❓"അന്നിരുപത്തിയൊന്നില്‍ നമ്മളിമ്മലയാളത്തില്

ഒത്തുചേര്‍ന്നു വെള്ളയോടെതിര്‍ത്തു നല്ല മട്ടില്

ഏറനാടിന്‍ ധീരമക്കള് ചോരചിന്തിയ നാട്ടില്

ചീറിടും പീരങ്കികള്‍ക്ക് മാറു കാട്ടിയ നാട്ടില്!"

'ഏറനാടിൻ ധീരമക്കൾ' എന്ന ഏറെ ജനപ്രിയമായ ഈ മലബാര്‍ പടപ്പാട്ട് എഴുതിയത് ആര്?

✅ കമ്പളത്ത് ഗോവിന്ദൻ നായർ. 

❓മലബാർ സമരത്തെ സ്വാതന്ത്ര്യ സമരമായി കേന്ദ്ര സര്‍ക്കാര്‍ അംഗീകരിച്ച വർഷം ഏത്?

✅ 1971-ല്‍.

❓അധിനിവേശ ഭീകരതക്കെതിരെ ഏറനാടൻ കർഷകസമൂഹം നടത്തിയ ഐതിഹാസികമായ മലബാർ സമരത്തെ 'ആയിരത്തി തൊള്ളായിരത്തി ഇരുപത്തി ഒന്ന്' എന്ന പേരിൽ അഭ്രപാളിയിലേക്ക് പകർത്തിയതാര്?

✅ ഐ.വി. ശശി.

🎯 1921 കാലത്തെ സാമൂഹികാവസ്ഥ, വേഷവിധാനങ്ങൾ, ആചാരാനുഷ്ഠനാങ്ങൾ, അയിത്തം, അടിച്ചമർത്തൽ, ഹിന്ദു-മുസ്ലിം ഐക്യം തകർക്കാൻ ബ്രിട്ടിഷുകാർ കാണിച്ച കുടിലതന്ത്രങ്ങൾ എന്നിവയല്ലാം ഈ സിനിമയിൽ യഥാതഥമായി ചിത്രീകരിച്ചിട്ടുണ്ട്.

❓മലബാർ സമരത്തിൽ പങ്കെടുത്തുവെന്ന പേരിൽ രാജ്യദ്രോഹക്കുറ്റത്തിനു ശിക്ഷിക്കപ്പെട്ട് ബെല്ലാരി ജയിലിൽ തടവനുഭവിച്ച കോൺഗ്രസ് നേതാവ് ചെർപ്പുളശ്ശേരി മോഴികുന്നത്ത് ബ്രഹ്മദത്തൻ നമ്പൂതിരിപ്പാട് തന്റെ അനുഭവസാക്ഷ്യമായി എഴുതിയ പുസ്തകം ഏത്?

✅ ഖിലാഫത്ത് സ്മരണകൾ. 

❓"1921-ൽ മലബാറിൽ നടന്ന സമരത്തെ മാപ്പിളലഹളയെന്നോ മലബാർ ലഹളയെന്നോ പറയുന്നത് ശരിയല്ല. മാപ്പിളവിപ്ലവം അഥവാ ഖിലാഫത്ത് വിപ്ലവം എന്നു പറഞ്ഞാൽ അത് ഏറെക്കുറെ ശരിയായിരിക്കും. ഒരു ലഹളയല്ല ഇവിടെ നടന്നത്, ഒരു ആഭ്യന്തര വിപ്ലവമാണ്..." എന്ന് അഭിപ്രായപ്പെട്ട കോൺഗ്രസ് നേതാവ് ആര്?

✅ ചെർപ്പുളശ്ശേരി മോഴികുന്നത്ത് ബ്രഹ്മദത്തൻ നമ്പൂതിരിപ്പാട് (ഖിലാഫത്ത് സ്മരണകൾ). 

❓'അല്ലല്ലയെന്തെല്ലാം ചെയ്യുന്നു കശ്മലര്‍, നല്ലാര്‍ ജനങ്ങളെ കാണ്‍ക വയ്യേ, അമ്മമാരില്ലേ സഹോദരിമാരില്ലേ ഇമ്മൂര്‍ഖര്‍ക്കീശ്വരചിന്തയില്ലേ?' 

മലബാർ സമരത്തെ അധികരിച്ച് രചിച്ച 'ദുരവസ്ഥ' എന്ന കവിതയിലൂടെ മാപ്പിളമാര്‍ക്കെതിരെ തീക്ഷ്ണ വിമര്‍ശനങ്ങൾ നടത്തിയ കവിയാര്?

✅ കുമാരനാശാൻ.

🎯 'ദുരവസ്ഥ'യിലെ ഈ വരികള്‍ കേരളത്തില്‍ പലയിടത്തും പ്രചരിച്ച ചില കുപ്രചാരണങ്ങളുടെ ഫലമായി താന്‍ എഴുതിപ്പോയതാണെന്നും, ആയത് തിരുത്താന്‍ മറ്റൊരു കൃതി പ്രസിദ്ധീകരിക്കുമെന്നും ആശാന്‍ പിന്നീട് വ്യക്തമാക്കിയിരുന്നു.

🎯 ആശാന്റെ 'ദുരവസ്ഥ' നേരിട്ട അനുഭവമല്ല; കേട്ടുകേള്‍വിയുടെ അടിസ്ഥാനത്തില്‍ വിരചിതമായതാണെന്ന് ഇ.എം.എസ് നിരീക്ഷിച്ചിട്ടുണ്ട്. 

❓മലബാർ കലാപത്തിൽ കൊല്ലപ്പെട്ട ഹിച്ച്‌കോക്ക് എന്ന കുപ്രസിദ്ധ പോലീസ് മേധാവിയുടെ സ്മരണയ്ക്കായി ബ്രിട്ടീഷ് ഗവൺമെന്റ് നിർമ്മിച്ച സ്മാരകം പൊളിച്ചു മാറ്റണമെന്ന് ആവശ്യപ്പെട്ട് കവിത എഴുതിയതാര്? 

✅ കമ്പളത്ത് ഗോവിന്ദൻ നായർ.

🎯 "രാജ്യസ്നേഹം വീറുകൊണ്ട കൂട്ടരുണ്ടീ നാട്ടില്, രക്ഷ വേണേൽ മണ്ടിക്കോ ഇംഗ്ലണ്ടില്..." എന്നെഴുതിയതിന് അദ്ദേഹത്തെ ജോലിയിൽ നിന്ന് പിരിച്ചു വിട്ടു. 

❓'ബ്ലാക്ക് ഹോൾ ഓഫ് പോത്തന്നൂർ (Black Hole of Podanur)' എന്ന് വാഗൺ ട്രാജഡി കൂട്ടക്കൊലയെ വിശേഷിപ്പിച്ച ബംഗാളി ചരിത്രകാരൻ ആര്?  

✅ സുമിത്ത് സർക്കാർ.

❓മലബാർ സമരം നടന്നതിനു ശേഷമുള്ള കാലഘട്ടത്തിലെ മൂന്ന് തലമുറകളിലുള്ള കഥാപാത്രങ്ങളെ കുറിച്ച് പറയുന്ന നോവൽ എത്? 

✅ പി.സി. കുട്ടിക്കൃഷ്ണൻ (ഉറൂബ്) രചിച്ച സുന്ദരികളും സുന്ദരന്മാരും. 

❓മലബാര്‍ സമരത്തെക്കുറിച്ച് പഠനം നടത്തിയിട്ടുള്ളവരില്‍ പ്രധാനിയായ കെ.എന്‍. പണിക്കര്‍ ഈ വിഷയത്തിലെഴുതിയ പുസ്തകത്തിന്റെ പേരെന്ത്? 

✅ Against Lord and State (1989). 

❓"ബ്രിട്ടീഷുകാരോട് മാപ്പ് പറയാൻ വിസമ്മതിക്കുകയും രക്തസാക്ഷിത്വം തിരഞ്ഞെടുക്കുകയും ചെയ്ത യോദ്ധാവാണ് വാരിയംകുന്നത്ത് കുഞ്ഞഹമ്മദ് ഹാജി. അദ്ദേഹത്തിന്റെ സ്ഥാനം ഭഗത് സിങിനൊപ്പം ആണ്.." ഇപ്രകാരം അഭിപ്രായപ്പെട്ട കേരള നിയമസഭ സ്പീക്കർ ആര്?

✅ എം.ബി. രാജേഷ്.